وحشاني يا مصر

[ندعوك للتسجيل في المنتدى أو التعريف بنفسك لمعاينة هذه الصورة]
أعذروني لو كنت هاكتب بالعاميه , لكن القلب و ما يريد
أصل مصر وحشتني أوي
وحشوني الناس
و الشارع
و نفسي أبرطم شويه
و أعيط كتير
و أضحك و أنا بافتكر
أيام مش من زمان أوي
إييييييييييه
و لا نقول أيوه
أيوه بيقولوها الإسكندرنيه
أصل إسكنديه فيها بحر كبير أوي ,
سامحوني لو كنت بأتكلم بطفولة شويه لكن ...
ده اللي نفسي أقوله
كنا فين
آه
كنا عند بحر إسكندرية
و الموج شايفاه في مراية الذكرايات عالي
عرفت كده قبل ما أوصل الشط
أصل الرايه كانت سوده
إمتى هتبقى بيضه !
العيال قاعدين عالرمل بيبنو الأهرامات من جديد
و في عيال بيسابقو الموج
و في ناس بتغوص و تدخل لجوه
و مش هاممهم الموج
و صوت صفارة الغواص بتنادي
يا أهل الشط
إطلعو عالبر
النهارده النزول ممنوع
....
يا ترى يا مصر لسه فاكراني ؟
يا ترى يا بحر إسكندرية فاكرني ؟
و الله يا مصر وحشاني
معرفش ليه
بس وحشاني
نفسي أرجع , أنام و أقوم
ألاقي نفسي فتحت عيني
على صوت العصافير
اللي بتزقزق جوه صندوق التكييف
و أشرب الشاي الصبح
و أنا براقب الناس من فوق البلاكونه
واقفين عالمحطة
مستنيين الأوتوبيس
و في الآخر ركبو ميكروباص
,
نفسي أروح جامع ابن طولون
و أقعد زي زمان بقلمين رصاص و حتة ورقة
أحاول أرسم المأذنه
و أفشل
و أقطع اللوحة
و أنساها
و أقعد أتأمل الحلزونية
و هي بتختفي من فوق
في السما
نفسي أقيس طولي
بالنسبه لارتفاع سقف مسجد السلطان حسن
و أكتشف إني نمله بالنسبه لضخامته
و نفسي أروح لميامى وهوا ميامى

و أقول يا سلام
لسه في البلد جدعان !
لكن أكتر حاجه نفسي فيها
إني أشوف مصر من فوق الطيارة
أشوف الخضره
و النيل
و الصحراء
و البحر
و أقول يا سلام يا مصر
إنت جميله أوي يا مصر
جميله يا حبيبتي
و غاليه أوي
و الراجل اللي بيشرب شيشه ده مش مقدرك
و الست اللي بتغشش عيالها في امتحان الثانويه العامه دي
مش بتحبك
و النجار اللي عمال يضرب بليه
مش فاهم يعني إيه مصر
و الناس اللي نسيو القرآن يا مصر
نسيوكي
لأن إسمك مذكور في القرآن
يا رب يخليكي لينا يا بلدنا
راجعين
راجعين
إن شاء الله
راجعين
[ندعوك للتسجيل في المنتدى أو التعريف بنفسك لمعاينة هذه الصورة]

تسلم ايدك

مرسى ياكيموووووووووووووووو

شكرا يا كيمو على المجهود رائعه

شاعر والله حلووووووووو

تسلم ايديك بجد

تسلم ايديك بجد