دفاعا عن المرأة المصرية المفترية

فى كل شارع
وفى كل حتة وعلى كل قهوة أو كوفى شوب أو حتى غرزة..فى الميكروباص والتاكسى
والأتوبيس أو حتى التوك توك تجد شكوى عامة من رجال مصر الأوفياء فى حق
زوجاتهم ..نكدية..رغاية..زنانة..طول النهار تجعر وتضرب فى العيال..عاملالى
مشاكل مع الجيران..مقشطانى أول بأول ومقصقصة ريشى..عليها لوية بوز.

والمشكلة مصرية بحتة..هتقولولى كل الرجال فى جميع أنحاء العالم بيشتكوا من
زوجاتهم ..أقولكم سورى ..الرجالة اللى بيشتكوا من زوجاتهم بره بتكون نسبتهم
من 20-30 قول حتى 50% .. لكن مصر الدولة الوحيدة اللى لو أتعمل فيها
أستفتاء على الموضوع ده هتطلع نسبته كالعادة 99.999%

طبعا فى ناس هتفتكر أنى جاية أنفى التهمة دى..لأ..مطلقا ..أبسلوتلى..أنا
أقر وأعترف أنى نموذج من نماذج المرأة المصرية المفترية ..أيوه أنا مفترية

بس على فكرة يا جماعة دى جينات.. وموضوع أفترى المرأة المصرية ده مش من
النهاردة ولا أمبارح ..ده موضوع ضارب بجذوره فى عمق التاريخ..يعنى مثلا
هتلاقوا صور على جدران المعابد الفرعونية فيها ستات ماسكيين فى أيديهم
خرزنات..هيضحكوا عليكم ويقولولكم مفاتيح الحياة وبتاع متصدقوش..دى كانت
الأدوان المستخدمة وقتها ..يعنى دى البديل الأثرى للشبشب أبو وردة وأيد
الهون..

طيب ليه الست المصرية مفترية؟؟..أهو هو ده السؤال اللى كنت مستنياه..الست
المصرية وبكل صراحة لا تملك ألا أن تكون مفترية..شايفة ناس بتهز دماغها ومش
عاجبها كلامى..طب بالذمة مطلوب من الست الغلبانة دى أييه؟؟...الراجل
بيتقدم لها وهى تقبل عشان يبقى ليها حيطة تتسند عليها فيتضح مع مرور الوقت
أن هى اللى لازم تبقى حيطة وسقف وأرضية كمان.

بتصحى الصبح تحضر الفطار وتلبس الأولاد وتفطرهم وتفطره طبعا وتنزل تجرى فى
الشارع تودى اللى هيروح مدرسة مدرسته وتودى اللى لسه مدخلش مدرسة عند
مامتها .. وترجع تجرى عشان تروح شغلها وتروح متأخرة وتتاخد تأخير وترجع من
الشغل تجيب نص العيال من المدرسة والنص التانى من عند مامتها وطبعا تفوت
على السوق عشان تجيب الخضار وبعدين تروح البيت جارة العيال وراها أو هم
اللى جارينها وتغير للعيال هدومهم ..وتبدأ تطبخ وبعد ما تطبخ تغرف وبعد
الأكل تغسل الأطباق والمواعيين وتعمل الشاى وبعدين تشوف لو فى غسيل أو
تنضيف.. وبعدين تقعد مع العيال تذاكر لواحد وتتخانق مع التانى عشان ضرب
أخته وتدعى على التالت اللى سايب كل الكراسات والورق اللى فى البيت ومصمم
يرسم على الحيطة....بعد الموال ده ما ينتهى بقى البيه اللى كل مسئولياته فى
الحياة أنه يروح الشغل ويرجع منه ياكل وينام..يرجع من على القهوة ويبص
للست الشقيانة طول النهار ويقولها:
-ده منظر تقابلى بيه جوزك ده؟.ما تفردى وشك شوية ولا تقومى تغيرى الهدوم
اللى عليكى دى ما أنتى قاعدة فاضية طول النهار أنتى وراكى حاجة؟؟!!

وبعدها يستغرب أوى لما تفتحله نافوخة بأيد الهون!!


لا المشكلة أن تعامل الراجل المصرى مع مراته مبيتضمنش بس عنصر الطناش
والتنفيض لا وعنصر البجاحة كمان.. يعنى فى أى مكان فيه طوابير زى محطة
القطر مثلا يقترح الزوج( بكل براءة) أنها تقف فى طابور الستات لأنه أقصر
وتدخل وتزاحم وتتبهدل ولما ترجعله بالتذاكر يشخط فيها ويقولها أتأخرتى
ليه..

الى يغيظ بقى ويفرس أنه معتبر مرتبها حق شرعى ليه ومذكور فى القران ويقولها والتقوى مرسومة على وشه:
-أنا مش محتاج مرتبك بس أنا شفت الشيخ فى التلفزيون بيقول اللى متسلمش
جوزها مرتبها أول الشهر تبقى ملعونة دنيا وآخرة وأنا طبعا خايف عليكى يا
حبيبتى
- وبعد ما تسلمه المرتب يتقلب 180 درجة
- تعال ذاكر للأولاد
- معنديش خلق
- الأنبوبة فضيت
- طيب وأنا مالى
- طيب شيل كوباية الشاى اللى شربت فيها
- وأنتى لازمتك أييه ؟!
- وبعدها يستغرب أوى لما تاكل دراعه وهو نايم !


حاجة كمان مهمة حكاية القصقصة والتقشيط..دايما الراجل بيتهم المدام أنها
بتستنى لما ينام وتجرى تفتش جيوبه وتقشط اللى فيهم..ده غير الخنصرة من فلوس
البيت والفلوس اللى بتتشال تحت البلاطة
-يا سلام! طيب ما هو بياخد مرتبها كله وبيديها مصروف يفرس ويعل ويسبلها 20
جنيه ويقولها عاوز أكل ملوخية بالأرانب ..ويجى كل شهرين تلاتة يقولها مزنوق
يا أم حمادة شوفيلى معاكى قرشين.. ولما الشتا يدخل والبرد يشتغل تقوله
عاوزيين دفاية عشان العيال يقولها منيين ده اللى جاى على أد اللى
رايح..وساعة لما تطلع حاجة من تحت البلاطة عشان تجيب هى تبقة ضلالية
وأيديها طويلة وبتسرقه.

- وبعدين يستغرب أوى لما تقطعة وتعبيه فى أكياس!


-وبعدين زعلان أوى كده ؟!..فارقها يا عم الحاج وأنت أييه اللى جابرك على كده؟

لكن الراجل المصرى الأصيل بيتكلم وخلاص.. لا هو زى الهندى يتخنق من مراته
يقوم دالق عليها أزازة كيروسيين ومولع فيها..ولا هو زى الأمريكانى يتخنق من
مراته فيضربها طلقة فى نافوخها ويرميها فى أى نهر ويلف يدور عليها مع
البوليس..ولا هو حتى زى الفرنساوى اللى لو أتخنق من مراته يقولها شوفيلك
بوى فريند عشان أعصابك تستريح شوية..المصرى كلام كلام وبس.. أكيد مش بطالب
يولعوا فينا ولا كل الكلام اللى فات.. بس مخنوق أوى كده يبقى فارقنا .. مش
هتقدر تمشى يبقى تلم الكراسى وتشطب المولد اللى أنت ناصبة فى كل مكان
وتسكت.

ميرسي يا خلود

مرسى لمروركم ياأحلى أعضاء