حوار جريدة الوسط مع الفنان محمد حماقى

لمحة من حياة فنان ... محمد حماقي وحياته الإنسانية
في البداية نحب أن تعرفنا بنفسك وطبعا الجميع يعرف محمد حماقى الفنان ولكن عندما يعرف النجم محمد حماقى نفسه سيكون أفضل....

الاسم: محمد ابراهيم محمد الحماقى

حماقي ولا حمائي؟
اسمي الحقيقي في شهادة الميلاد حماقي ، لكن طبعا في مصر بننطق القاف همزة ، فاشتهر الاسم حمائي ، وحماقي.

هل حماقى اسم مصري ؟

نعم مصري ولكن أحنا في مصر ما بننطقش حرف القاف .

الاسم غريب على مصر ، هل لك أصول غير مصرية ؟

لا , جذور العائلة كلها من مصر إحنا من بنها وفيه من العائلة حسب ما اسمع من بورسعيد ومن الإسكندرية

ولى أخ واحد أكبر منى وأب وأم والحمد لله أحياء

خريج كلية تربية موسيقية

سني 32 سنة

الحالة الاجتماعية أعزب ..

لماذا ؟
والله هو الموضوع نصيب وأنا مش عايز استعجل في الاختيار وخصوصا إن اللى بيخوفنى في الوسط الفني
حدوث الطلاق الكثير فأنا مش عايز استعجل .

32 سنة ومش عايز تستعجل ؟

لا أنا اقصد مش عايز استعجل في الاختيار , لأني مش عايز أخطا في الاختيار ويترتب على هذا الخطأ مشاكل كتيرة في حياتي

ما هي مواصفاتك في شريكة الحياة ؟

أنا بصراحة لا يشغلني الجمال أوى , ولكن اللى يهمنى أن تكون طيبة زى أمي , وعندها ثقافة , و أهمها أنها تكون فاهمة انها ست ,لأن ستات كتير جدا طريقة كلامهم وتعاملاتهم بحس أنهم ناسيين أنهم ستات , وأحب بردوا إن زوجتي يكون لها شخصية ايجابية وليست شخصية متسلطة , أحس بمشاركتها لي في حياتي عن طريق النصيحة والاهتمام بي وهكذا ..

أحيانا بعض الفنانين نشعر أن هناك بينهم وبين الدين حساسية فما هو رأيك في هذا الأمر ؟

أنا كنت سمعت حديث بيقول ( حفت الجنة بالمكاره وحفت النار بالشهوات ) فالطريق للجنة صعب مش على الفنانين بس ... لا على الناس كلها عشان تاخد الثمرة لازم تتعب شوية.

ودا يرجع إلى أن الدين في إعلامنا أو أن إعلامنا لا يظهر الدين بالشكل اللى المفروض يظهر عليه ، شوية مشاكل بتحصل في حياتنا الإعلام بيجى يكبرها ويعمل مشكلة كبيرة ، والناس كتير ببتتلخبط ومفيش حد بيقول الصح من الغلط بس طبعا ده مش مبرر لان كل واحد في إيده يا خذ خطوة للأمام ، ومش سبب إننا نكون بعيد,
ومش صعب. ... أنت فى خمس دقائق تجرب وتقرب ممكن تدخل المسجد تقرأ قرءان , حد يعلمك حاجه بس ما على الإنسان إلا انه ياخذ الخطوة الأولى , بس وزى ما قلت هو الموضوع مش صعب وبنصح أي حد انه ياخذ الخطوة ويجرب زى ما بيجرب أى حاجه تانيه وبيندم بعد كده ليه مانجربش نمشى في الطريق ده وأكيد كلنا محتاجين الدين وعمرنا ما هنندم إذا تقربنا إلى ربنا سبحانه وتعالى.

وبردوا في حاجه تانيه مهمة إن فيه ناس دايما بتفتكر إن المتدين ده راجل فاضي مابيعملش حاجه غير إنه يصلي في المسجد وده طبعا غلط ده في مهندسين ودكاتره ورجال أعمال ومتدينين بردوا وبيمارسوا حياتهم طبيعي ,

وبقول دايما لأي حد أنت جربت حاجات كتير وطلعت في الأخر غلط ، طيب جرب ديه ومش هاتخسر حاجه .

محمد حماقي والمشاعر الإنسانية

يا ترى الفنان محمد حماقى بيتابع الأحداث والنشرات الإخبارية في فلسطين والعراق ولبنان ويا ترى ما مدى اهتمامك كانسان قبل ما تكون فنان تجاه ما يحدث للمسلمين من مشاكل في هذه البلاد ؟

أنا بتشغلنى الأخبار جدا من الناحية الإنسانية يعنى بتعب جدا لما بشوف الأطفال عمالة تموت وتتعذب أكتر ما بيهمنى الصراعات السياسية بين الحكومات ، للأسف الموضوع ده مش في ايدينا زى مثلا العراق دلوقتى أكتر حاجه بتؤلمنى هى الناس الغلابة اللى عمالة تموت وتتدبح نتيجة صراعات سياسية هى ملهاش دخل بها.

أحنا بنلاحظ إن الأخبار السياسية أصبحت تجذب اهتمام ناس كتير ليس عندنا فقط بل وفى أوروبا ارتفعت نسبة مشاهدة الأخبار السياسية في أوروبا كثيرا ، ورغم هذا نجد أن كثيرا من الفنانين العرب لا يظهروا أي اهتمام إلى الأحداث الجارية في بلادهم أو ما يجرى في العراق وفلسطين ولا يعبر الفن الذي يقدمونه عن ما يجرى من أحداث ، بل أننا نجد إن الفن الذي يقدمونه لا يتعدى الحب والغرام فما هو السبب من وجه نظرك ؟

لا بالعكس أنا كنت اشتركت في اوبريت من حولي سنتين تلاتة اسمه ( القدس هاترجعلنا ) وكان اشترك في الأوبريت دا فنانين كتير جدا ودا كان بسبب قتل محمد الدرة في فلسطين لان الموقف كان صعب أوى على الكل.

وعادة الموضوع ده بيحصل لما بيحدث حاجه كبيرة زى محمد الدرة مثلا ودايما بيبقى في حالة جمود كده لغاية لما يحصل حدث صعب يفوق الناس وتلاقى الناس كلها بتكلم بعض بانفعال , الانفعال ده هو اللى بيحركنا .

لكن هل هناك تفاعل مع الأحداث ؟

طبعا يوجد ولكن ماذا سيفعل.

وماذا تفعل النشرات والأخبار والقنوات المختلفة ؟

أعتقد أنها تزيد الأمر بلاء فمثلا عندما يرى الرجل من حماس فتح تقتل زملاءه والعكس سيزداد الأمر سوءا ويزيد الانفعال.

أقصد أننا نرى الفن يقدم جوانب الحياة المختلفة مش حب وغرام فقط ؟

لا طبعا وأنا معاك فى النقطة ديه ، وعشان كده إحنا كان فيه اغنية تأليف أيمن بهجت وتلحينى كلماتها جميلة جدا كان المفروض يغنيها هشام عباس لكن انا اللى هاغنيها.

ايه موضوعها ؟

موضوعها عن اليهود وكلمات الأغنية

سيدنا موسى كان نبيهم
انزله المولى عليهم
يوم ما راح ياخد الوصايا العشرة ليهم
خانوه .. جيه المسيح يوم معاهم
بردوا شاف الويل معاهم
رغم انه بمعجزات الله شفاهم
بردوا خانوه
كان غضب من ربنا
يتشردوا هنا وهنا
سنين كتير والوقت فات
صحى الخبيث المستكين والقلب مات
صهيونى خبيث
طمعان فى الفلسطينى البرىء
أفعى ورافعة الراية من فوق كوم فتات
أول ما قالوا إسرائيل
ابتدا جهادنا الطويل
لا اله الا الله
كلنا فدائي وشهيد
قتل ودمار وجنون ولوثه
والضحايا شيوخ .. قساوسة
ماعندهمش حرام وعيب
صبراوشتيلا
وقانا يانا والناس قتيله
والاهانة شكلها أصبح معيب
والمسجد الاقصى وخلافه
واليوم اللى الطفل شافه
خلى شعر راسه يشيب
لا اله الا الله
كله دين وتار قديم

أيضا كان فيه أغنية لفيلم محمد هنيدى كلموني عشان اعملها ... كلماتها بتقول:

لو ايدى في أيد أخويه
ابن امى وابويه
يشيل عنى همي
وأنا أديله عينى
لو حاجه ناقصانى
يموت نفسه عشانى
أنا قوى وهو جنبي
كام مرة الكلام ده قلنا
وعدنا ولا ده كله
كلام أغاني مابنعملش بيه

الأغنية بتتكلم عن معانى جميلة جدا بس ما بنعملش بيه .

وقفة مع النفس ولحظة تفكير .....

حضرنا جنازة رياض الهمشري الحقيقة يا محمد أنت عجبتنى جدا في جنازة المرحوم بإذن الله رياض الهمشري لأني لاقيتك واقف وقفة راجل وخصوصا عندما أراد المصورون النزول إلى القبر بالكاميرات فأعترضتهم ومنعتهم من النزول فى هذا الموقف تحديدا فيم كنت تفكر ؟

كنت بفكر إني ممكن أكون بكره مكانه أو بعد شويه ممكن في أي لحظة أكون مكان رياض ،وكلنا هنا بس محدش عارف مين قبل مين , وكنت وأنا في الجنازة كنت حاسس إن أنا مكان رياض وبيحصلي اللى بيحصلوه بالظبط , وإن ممكن إني أكون أنا , فبصراحة المسالة صعبة , حاجه صعبة مش إنك تموت لا هي صعبه على إنك رايح ازاى والموضوع ده حاسس انه بيمنعنى من حاجات كتير .

من وجهة نظرك يا محمد ما مدى تأثير أغنية مثلا كلماتها عن الموت والقبر والحساب في الناس وهل ممكن تكون أغنية زى ديه سبب في إن الناس تقرب من ربنا سبحانه وتعالى ؟

الناس بتتعامل مع الأغنية على إنها ترفيه. من وجهة نظري إن الفكرة ديه صعب تنفيذها كأغنية ، صعب لأن الناس أتعودت أن الأغنية عبارة عن ترفيه وليس عظة أو عبرة و أنت بتتكلم عن أصعب حاجه أنت بتقوله موت فالموضوع قاتم أوى وصعب من وجهة نظري إن الناس تتقبله.

لكن ممكن تتعمل الفكرة والمعنى المهم ده كفيلم لأن الفيلم هيكون مدة أطول ويمكن عرض المعنى بشكل تفصيلى أكتر لما بعد الموت بطريقة تجعل الشخص الذى مات يعيش بروحه مع المشاهد وهو يرى أن كل ما كان يملكه أصبح لا يملك منه شيئا ( فزوجته تزوجت غيره وأبناؤه باعوا سيارته يعنى مثلا ، هذه الفكرة ستكون رائعة اذا اتعملت كفيلم وليس كأغنية ، لأن الأغنية مدتها الزمنية دقائق ولا تتيح لهذه المعانى جميعا أن توجد فيها .... ناس كتير اوى تلاقيها بتسأل سؤال واحد ياترى لو مت رد فعل الناس هايبقى ايه وكل الحاجات الللى بتتعلق بيها واللى انت حاسس انها ملكك اصبحت مش ملكك بس ممكن المعنى ده يتعمل فيلم ويكون جميل جدا
وممكن توصل بردوا مسألة الندم على اللى راح ولو كنت عملت كذا ....

تجربة الإنشاد الديني ونجاحها....

تجربة الأناشيد الدينية تجربة أثبتت نجاحها هل تفكر في خوض هذه التجربة فى الفترة القادمة وخاصة أنك قد قابلت مشارى راشد العفاسي وهل يمكن أن تحكي لنا الظروف الخاصة لهذة المقابلة وكيف تمت ؟

الحقيقة أنا كنت في جلسة مع رجل أعمال يملك عدة قنوات فضائية منها قناة العفاسي المسئول منها مشاري راشد
فقلت له أنا نفسي أقابل الراجل ده ، ففوجئت أنه طلع الموبايل وراح متصل بمشارى وقاله أنا معايا محمد حماقي وفعلا رحنا لمشاري في الأستوديو اللي بيسجل فيه ، وسعدت جدا بمقابلته ووجدته رجل مثقف ومتطور يبحث عن الجديد ومما لفت نظري هو تجهيزه للأستوديو أول ما دخل وكيفية تعامله مع أحدث الأجهزة وهذا الأمر يحتاج إلى مهندس .... وسمعني النشيد اللي كان بيسجله ورغم إن كان فيه مهندس موجود لكن هو اللي جهز كل حاجه , فعجبنى جدا إنه فاهم وانه عارف يستخدم كل جهاز, وعجبنى انه بيدور على الحاجة الكويسة ,
وتكلمت معه في أمور عديدة ، وهو دمه خفيف جدا والواحد حب القاعدة معاه .

سبب في الهداية

الحقيقة كنا عرفنا موقف كنت أنت سبب في هداية مطرب لبناني لم يكن في حياته قد صلى من قبل ولا توضأ ولا يعرف كيف يفعل ذلك وقد كانت أول صلاة يصليها في حياته كانت في بيتك ياريت تحكيلنا ظروف هذا الموقف وأيه شعورك لحظتها ؟

أنا كنت متأثر جدا بالموقف ده وكنت حقيقي حاسس إن فيه اجر كبير يا رب ربنا يكتبهولنا لكنى كنت بفكر ازاى هو كان عايش كده وحاله هو اللي خضنى .... وكنت وإحنا بنصلي مش عارف أركز في الصلاة لأني كنت عمال انظر ليه خايف يغلط ولا حاجه .... وتأثرت جدا لما جيه الراجل ده وقالي بعد ما صلينا عارف وأنا بصلي دعيت ربنا أنى أموت دلوقتى ما حدش قاله دا كان احساس جاله وكنت حاسس بيه .

شكرا كيمو علي الاخبار