تعمل إيه لو الفرح منك يتخطف
والدم تلاقيه ف عروقك نشف
واللي حبيته سنين يبقى م الخاينين
والحقيقة المرة فجأة قدامك تنكشف

تعمل إيه لو بعينيك تشوفه بيخونك
والدمع ما تقدر تمنعه يملى عيونك
ويهرب منك الكلام وتكتفي بالانهزام
وتكسر كل القزاز في لحظة جنونك

تعمل إيه لو الحلم منك يتسرق
وتحس ان الكلام ف حلقك بيتخنق
ونبض قلبك بيختفي واحساسك بينطفي
وأحلي الذكريات تسيبها ف ايديك تتحرق

تعمل إيه لو انت كنت مكاني
وبقيت انت المجني عليه وانا الجاني
ح تحس نفس احساسي ح تتعذب ح تقاسي
ولاّ مش ح تفرق معاك وتنساني