وعد العيون اصدق وعود الحب.... !!

وعد العيون اصدق وعود الحب..

وعنيه قالولي كلام كتير من القلب..

انا لما شفت عنيه ملانى هواه..

واخترته يبقى حبيبى وابقى معاه..

ايه الكلام الكبير ده يا واد ؟؟

انت بقيت بتحب على نفسك ولا ايه يا عم !!

يا عم متلاحقش عليا .. اصبر على رزقك ..

انهارده موضوعنا مختلف حبتين .. او يمكن 3 حبات ..

بس الصراحه موضوع استراتيجى جدا وبيمس كتير مننا ..علشان كده عايزك تركز فى الكلمتين ..

كتير من الناس بيسـأل وخصوصا الشباب : هو فيه حاجة اسمها حب من اول نظره ؟؟

وفيه ناس تقول : انا مش مقتنع باول نظره دى .. واسعه شويه ..

احنا ممكن نقول هو فيه حب بلغة العيون ؟؟

يعنى ايه يا عم الحبيب ؟؟

يعنى تبقى قاعد فى المدرج وعمال مشغل الرادار وعينيك بتلف هنا وهناك ..تقوم عينيك واقعه فى عين احد الانسات الفضليات ..

تقول : بس .. يا سلام.. اخيرا لقيت حب عمرى ..!!

وهى تقول الواد ده شكله بيحبنى ..
شكله ايه بس..ده هيموت عليا ..
انا ملاحظه نظراته .. بقاله سنه كامله بيبحلق فيا
( وهى نظرة يتيمه بس هنقول ايه؟!! )

وتستمر الحدوته وتقعد تحلم بيه وهو يحلم بيها فى كل وقت وحين

وطبعا الحوار ده منه كتيييييييييييير..

وكان على ايدي واحد منهم ..

صاحبى الانتيم ..

جالى فى يوم بيقولى خلى بالك من فلانه هتلاقيها بتبص عليا..

لقيتها فعلا بتبص علينا ..
قولتله وليه متكونش بتبص عليا انا ؟؟

ولا انا وقعت من قعر الحله ؟؟

قالى هى بتبص عليك علشان انت صاحبى فتفهم من كده انها بتحبنى وتوصلى الكلام ده !!!!!

ومره تضحكله وهو يضحكلها..المهم..قعدوا سنتين هى تبصله وهو يبصلها وعايشين الدور.. وهى اتخطبت بعد كده وهو قعد يغنى ظلموه!!

والواحد الصارحه من اللى بيقراه ع النت ويشوفه فى الموضوع ده بلاااااااااااوى..
كنت قريت فى مره على احد المنتديات بنت بتقول انها قابلت احد الشباب فى مره
فى جمعية عمل خيرى ومن اول نظره شافته وهى اتعلقت بيه وقلبها ياعيني
بيفرفر .. قصدى يرفرف .. كل ما تفتكره .. وعماله تستغيث الحقونى .. نفسى
اوصله .. نفسى اكلمه .. نفسى اعرفه انى بحبه !!

وطبعا ده منه كتير برضه

نتكلم جد شويه بقى..
كل اللى بيحصل ده يا شباب ويا بنات اسمه انجذاب فطرى..

مفيش حاجه اسمها حب من اول نظره ولا تانى نظره ولا عاشر نظره..!!

وطبعا انا عارف ان الكلام مش هيعجب ناس كتير ..
وهتلاقى واحد ولا واحده بيرد (فى اعماقه طبعا) ويقول :
اصلك مجربتش ..واللى ايده فى الميه مش زى اللى ايده فى النار..ده الحب من اول نظره ده حاجه كده متتوصفش !!

مسمعتش تيمورى وهو بيقول :
عمرها حصلتلك دي تبقي لسه شايف حد وانت لسه متعرفوش ..ايوة متعرفوش..!!

ومسمعتش عمورى وهو بيقول :
ضحكت ..يعنى قلبها مال..وخلاص الفرق ما بينا اتشال!

يا حبيب قلبى . .يا اختى ..
هو كلام الاغانى كلام مقدس..؟؟
ده هو ده اللى مضيعنا ومضيع اخلاقنا وحياءنا ومودينا فى داهيه !!

كفايه بقى ... عايزين نبطل نضحك على نفسنا شويه ..!!
زى ما قولنا .. ده اسمه انجذاب فطرى بين الرجل والمرأه .. هو ربنا خالقنا كده ..

مثال بسيط..

لو اعتبرنا الولاد قطب موجب + والبنات قطب سالب -
لازم يحصل تجازب..
ايا كان مين الولد وايا كانت مين البنت!!

علشان كده الدين حطلنا ضوابط علشان يمنع الفتنه دى ..
فامرنا بغض البصر وامر البنات بعدم الخضوع بالقول وعدم الاختلاط اللى ملهوش لازمه والحجاب الشرعى وهكذا ...

فبلاش تعيش نفسك الوهم وتفضل تعلى تعلى تعلى لغاية ما تنزل على جدور رقبتك مره واحده !!

هيرد شاب محترم او بنت محترمه وهيقول : ده مش وهم .. وحضرتك كفاية اساءه للحب الشريف الطاهر ..
انت عمال تغلط واحنا ساكتين !!
انا على ايدي دي كذا واحده من صحباتي متجوزين اولاد حبوهم كده .. وانا كمان كذا واحد من اصحابى اتجوز واحده بالطريقه دى !!

يا حبيب قلبى ..ويا اختى ..
لو فرضنا ان ده بيحصل .. هل ده قاعده عامه ؟؟
لا طبعا..دى شواذ...كام واحد او واحده بيتجوزا كده ؟؟
وهل الجواز بيبقى سعيد بعد كده ؟؟ معتقدش !!

وخليك فاكر كويس ان واحده بصتلك .. اكيد بصت لغيرك قبل كده او هتبص بعد كده !!
وخليكى فاكره كويس ان واحد بصلك .. اكيد بص لغيرك قبل كده او هيبص بعد كده !!

هيرد الشاب المحترم تانى ويقول : احنا مش بنبص لبعض .. ده انا اول ما عينيا بتيجى فى عينيها بروح منزل عيني وهى كذلك ..
شوفت بقى ان حبنا حب طاهر ازاى غير اى حب تانى !!

نرجع ونقول لو كان ده بيحصل .. فده فى الاول بس .. بيبقى فيه لسه شوية حياء
موجودين .. والموضوع بيطور بعد كده زى ما كلنا بنشوف ولا انت مش معايا
؟؟!!

يبقى اتفقنا ان مفيش حاجه اسمها حب من اول نظره والكلام ده ..
الحب الحقيقى بينشأ من الالفه والموده بعد الجواز ..

نصيحتى فى اخر الموضوع ..لكل بنت .. حياءك هو زينتك..لو اتشال .. مش هيبقى ليكى لا طعم ولا لون ..

احفظى نفسك .. ومتخافيش على الجواز .. الشاب اللى هيتجوزك اسمه مكتوب من يوم ما خلق الله الخليقه بخمسين ألف سنه

الدليل قول النبي عليه الصلاة والسلام :

( أول ما خلق الله القلم فقال اكتب قال و ما أكتب يا رب ؟؟
قال اكتب القدر ..
قال فجرى القلم في تلك الساعة بما كان و بما هو كائن إلى الأبد )
.. يعني مش نظرتك ليه او حبك ليه هو اللى هيخيله يتجوزك .. طهرى قلبك من كل حب حرام ..و حطى بداله حب لله ..ا عظم حب فى الوجود ..

وانت يا عم الشاب .. مش ناوى تغض بصرك بقى ..؟؟
اصبر واستعن بالله ..
ومن يستعفف يعفه الله .. ومن يتصبر يصبره الله ..
وخليك حريص فى اختيار زوجتك ام اولادك ..

طهر قلبك من الحب الحرام .. وحط بداله حب الله .. اعظم حب فى الوجود ..

ولو ناوى على جواز بجد ..
ادخل البيت من بابه وتوكل على الله ..
pirat

تسلم ياكيموووووووو يا جامدددددددد

شكرا يابرنس الليالى

تسلم يا كيموووووووووو ياااااا قمرررررررر

تسلم الايادي ياعسسسل

عروقي تحتويك
كل الشكر والامتنان على روعهـ بوحـك
وروعهـ مانــثرت وجماليهـ طرحك
دائما متميز في الانتقاء
سلمت على روعه طرحك
نترقب المزيد من جديدك الرائع
دمت ودام لنا روعه مواضيعك
لكـ خالص احترامي

» 00000نور العيون 00000000
» إثبات عذاب القبر وعود الروح إلى الجسد
» انواع الحب والرومانسية, انواع الحب الحقيقى, انواع الحب عند الشباب والبنات
» ((أحب الحب من حبك))
» الحب